Solenne 2010

Quanto ti si belo paese mio
vestito da festa: de fiuri,
de festuni, de luci, de archi,
de cocarde, de bandiere e de nastri,
color del cielo e imacolà.
Ogni canton l'è proprio da vardar!
Anca su ala Selva e al'Agujana
e fin ai remoti confini del paese
tuti se ga unio e ga fato a gara
par pareciar la festa de la Solene.
Co te go visto Madona cara
alzare in trono
portà dai tusi in procession
fra tanta gente,
che de preghiere e canti
formava on coro
me son sentia elevà spiritualmente.
Le lagrime scendea dal cielo grigio
le ombrele se verzea soto de ti
formando on manto de colori
che mai gavevo visto fin a ch'el dì.
Madona de Montebelo
ogun de n'altri te portemo in core
come ne cara mama te preghemo
parché le nostre fameje cressa nell'Amore.

Laura Mioli Bonin